بدري عليك..!

سأترك صغائر الأمور لأسمو..
كلمات في نهايات الصغائر....!!

..................


الا على طاري اللي قلته البارح..
معقوله انت الصغير اللي كبر توه..

صدق الحكي مؤلم الا قاسي وجارح..
والله يامثلك لأطفي ناره وضوه..

من وقتها والفكر ياصاحبي سارح..
اقول وشلون اعكر بالفكر جوه..

....................


لاتقول..!!
يعني كبرت؟..من متى بالله صرت..
صارت حروفك كبيره..وانفعالاتك خطيرة..
بس مشكلتك خطيت..وجيتني..
تبغى الصراحه: والله بدري عليك..

مثلك لو انه همني كان جحيته..
واعتذرت بوسط بيته..
واحتريت الطيب..الا واحتريته..
بس:والله بدري عليك..

يااكبر العالم جسم..
واصغر العالم فهم..
ياتنعدل..يااعلمك وشلون تصبح محترم..
تدري عاد: والله بدري عليك..,,!!

لحظة قبل لااترك انسام الوله ياابها..

ابها..مخطوبة الغيم..
هكذا عشتها في صيف اشبه بالحلم..
.........,,

مجنونة الغيم لاتكتب ولاتقرا..
يكتب لها الغيم والقمرا تهجاها..

لاتلوم اهلها ليا منهم غدوا اسرى..
اصلا يقولون :كل العالم اسراها..

الغيم والليل سر الليله القمرا..
وابها خذت حسنها والخالق اعطاها..

اقبلتها والحكايا قبلها قشرا..
واقفيت اسولف معي سبحانه اولاها..

تشبه سواليف طفلة حينا الصغرى..
الغــنج يبدابــها قبل يتبــداها..

وش قصة الدفتر؟!

تشير الساعة الى الثانية مساء بتوقيت الذكرى..
ولايزال في دفتري متسع للشوق وقليل من البكاء حزنا..

.........


قريت اخر حكي في دفتر الذكرى وصكيته..
اخــاف الدمع يكتبني على دفتر معاناتي..

واذا دمع وهدر قلي :لـمن ياحظ هليته؟..
على اللي من ثمان اقفى ولخبط لي حساباتي..

عرفته قبل يتعلم يحـط الكحل واعطيتـه...
خفوقي واثر من يعطي خفوقه طفل بيحاتي..

لعب بي لـين ولعني لكـني ماتهنـيته..
خذاه الوقت لاوالله خذا وقتي وبسماتي..

تعلم كيف يندهلي واقول اهلا ولبيته..
تعلم كيف يجبرني احطه داخل ابياتي..

تعلم وش تعلم؟ غير لامن ضاق به بيته..
اجيه بدون مااتردد ولو كانت نهـاياتي..

لازلت صغيرا...لتحب..,,

صغيري:لازلت في مهد الحب صبيا..
لازلت صغيرا ياصغيرا لتموت عاشقا..
لازالت يداك غضة لاتقوى على جفاف الود..
ولازال خدك اسمى من ان تشوهه معالم الحزن..
..
الحب ياصغيري:

*ان تسبقهم الى الشمس في سويعات الصباح الأولى لتتخيلها شمسا تشرق..

الحب ياصغيري:

*ان تستظل احداقها عندما يحرقك لهيب شمسها..

الحب ياصغيري:

*ان تتخيل الكون وقد غربت شمسها وغاب وميضها..

الحب ياصغيري:

*أن تسامر حكاياها وان تجالسها في غفلة القمر وموت الشمس..

الحب ياصغيري:

*ان تباغتها في الثلث الاخير من انفاس ليلها لتشرق في عالمها وتراك شمسها..


الحب ياصغيري:

*ان يتسع افقك وتكبر احلامك وتصبح رجلا يحدث صغاره عن الحب..,,,,!!!!

سوالف ليلي التايه..,,

سوالف ليلي التايه..,,
......

الليل توه بـدا والحزن من بدري..
والشمس عيت تبعثر وضعي المظلم..

النور ياصاحبي شكله كذا مغري..
بالذات لامن كسر قيد العنا المؤلم..

النور ماهوب نور الصبح لو يسري..
النور نور الجبين الحالي المفعم..

ابطى غيابه ولامل الغلا كبري..
يزورني طيفه وجعل الغلا يسلم..

ياعنفوان الهوى ياروحي وعمري..
معذور لو قلت:مثلك في الهوى مغنم..

قالوا لي احذر يباس الحب من صغري..
كذبت كل الحكي والله كذا يعلم..

وتغيب واقول :بدري يالغلا بدري..
والقاك عقب البطا واقول : انا احلم..

رباعية..,,

رباعيية ربما لاترتقي الى ذائقتكم..
لكم ان تقرأوها..وتنتقدوها كما هي..

,,,,,,,,,,,,,,,,,,,,,,,,,,,,,,,,,,,,,,,


أقسى دموع الهواوي دمعة المقفي..
وأكبر حكايا السنين معانق الراحل..

تحاول ترد دمعك والحزن مخفي..
كنك على شط واحزانك مثل ساحل..

كن الحزن مركي(ن) حمله على كتفي..
شفني غريب وتأمل جسمي الناحل..

الليل لاحل شفتك يالوجع ملفي..
والصبح مايسرق اوجاع المسا لاحل..

حمـــــــــــدان..,,

حمدان شاب الــ(15) عاما..
خرج من بيته يوم الجمعه الماضي ليجدني امامه وقد عزمت الرحيل الى منزل اخر..
كانت صدمه بالنسبه له كونه للتو يعلم..خصوصا اننا جيران منذ 8 او 9 اعوام..
سألني:( انت ناقل؟ فأجبته (نعم)..
تأملني قليلا ثم ادار وجهه بعد ان رأيت عينيه بالكاد تمسك دمعته..,,
ــــــــــــــــــــــــــــــــــــــــــــــــــ ـــــــــــــــــــــــــــ
علموا حمدان يااهل الطيب لايقفى دخيله..
عارف ان الدمع ياحمدان فضاح الرجالي..

الزمن يااخوك يوم ويوم في حطه وشيله..
وانت لاتحزن ترى دمعك ورب البيت غالي..

هي كذا دنيا الشقا والا القدر مافيه حيله..
وان تركت البيت هذا ماتركت اللي وفالي..

اللقا فارس وحظه خيله اللي هد خيله..
والبقا في راسك اللي يعتبر لي راس مالي..

ماقدرت اقول يالله في امان الله ليله..
خايف ان الصوت قبل العين يبكيني ليالي..

يالمكان اللي سكنته من ثمان سنين ويله..
حال صالح من شقا فرقاه واللي به بقالي..