ياابوي قم عزني..,,

قصيدة تمنيت لو لم افكر حتى بنشرها لكن ولان من يتابعني بحق يستحق الكثير فهي لكم..
ارسلتها لوالدي فأبكته..كونه يوما اوصاني بالصديق وتفاجأ بردي:





..............
سته وعشرين عام اقفت وتوي شباب ..
فيها تعلمت من دنيا العجايب كثير..

علمني الوالد اخذ لي رفيق وزهاب..
وعلمني ان الغني من فاد عمره صغير..

وادركت سر الوصية والجمل والكتاب..
يسلم ومثله كبير ومايقوله كبير..

والحين عقب السنين الموجعه والعذاب*..
ياابوي اباحكي لك اللي صار واللي يصير..

في وقتكم كان طهر القلب والغل غاب..
وبوقتنا كل شئ تبدل وصار غير..

في وقتكم يفتدون اصحابهم بالرقاب..
وبوقتنا لو يقال فلان؟ قالوا: يطير..

كان الخوي لاسأل يلقى الوفا والجواب..
والا الخوي في الزمن هذا يعود كسير..

الناس كانت نقا وقلوبها ماتهاب..
والحين لاجل الدراهم والهلل والثمير..

في هالزمن من معه قرشين يصبح مهاب..
والذيب ماله رفيق بحجة انه فقير..

ياابوي قم عزني خل الزمن للذهاب..
خاويت رجل(ن) حسبته مثل حضرة الامير..

خل السعه ,والشدايد مثل شوف الشهاب..
دورت له يوم ابيه وقام يرجع يحير..

صديت وآمنت بان الصدق مثل السراب..
يمكن به اصحاب لكن العجايب كثير..
.............
العذاب:تعني العذبه جمعها عذاب ..
..

صـــآير أميـــر..,,
كتبت في 1/5/1433هـ
نشرت في 8/5/1433هـ